السبت، 6 يونيو 2009

اغتراب(1)

بسم الله الرحمن الرحيم

السلام عليكم و رحمة الله

معلش الادراج المرة دى عبيط جدا بئا

صباح الخير يا روعة الشروق..مهما كانت وحشة الليل لازم تطلع طاقة نهار..
محدش بيواسينى ولا يحن عليا قد نور السما..قد متعة الطيران فى السما
ياترى نهارى هيطلع؟؟
ولا حياتى هتفضل زى لون ريشى..أسود
الكل بيكرهنى عشان انا غراب مع انى طيب و ما بأذيش حد
انا مش حداية بتخطف الكتاكيت الصغيرة من حنان مامتهم
انا حتى اتحرمت من حنان الام
ماما لما جابتنى للدنيا انا واخواتى طارت على طول ومن يومها ما شفتهاش
الحمامة اللى جنبنا لما جابت زغاليلها للدنيا كانت بتحصنهم بين جناحاتها وتجيبلهم الاكل والشرب من اخر الدنيا
لكن مامتنا احنا سابتنا
كنا صغيرين نفسنا نشوف مامتنا بتعلمنا الطيران زى كل الطيور
كنا حاسين بافتقاد الحنان
بس الحمد لله ربنا كان مخلى الفراشات تنجذب لنا عشان ناكلها
وكبرنا الحمد لله واترحمنا من الطفولة المجروحة دى
عيشنا زى القنافذ مع اننا طيور
القنفد مامته ما بتحضنوش عشان مليان شوك فبيبقى محروم من الحنان
لكن احنا ريشنا ناعم..لكن بنلاقى نفسنا مرميين ف الدنيا الواسعة
بنتعلم الطيران لوحدنا واهى الدنيا بتعلم
وبعد ما دوقت القسوة من اعز الناس..الام
بلاقى القسوة من كل الكائنات..بالذات البشر

يللا هطير بقى..الله بحب الطيران اوى..هو الحاجة الوحيدة اللى بتحسسنى انى من الطيور..لما بطير واحلق وسط نسايم الفجرية برتاااااااح اوى..بحس انى صفيت وهديت..بفضفض عن نفسى بالطيران..بيريحنى اوى..والتغريد بيطلع كل العذاب اللى جوايا..بغنى موالى يملا السما زى احلامى..احلامى بالحنان

بمر على مدرسة بنات..ايه دة المس اللى بتدرسلهم بتقفل الشبابيك..للدرجة دى صوتى ضايقها؟؟انا مخنوق .. مش من حقى اغنى شكوتى؟؟مش حقى افرغ غضبى و ارتاح واتنفس؟؟مش من حقى ابكى واستريح؟؟

كل الطيور بتشكى موالها مع ان مفيش طير فى قلبه حزنى..وكلهم الناس بتحب تغريدهم وانا بيكرهوا صوتى وبيكرهوا كل حاجة فيا

انا اسف انى كنت بفضفض زى ما كل الطيور بتفضفض..انا اسف انى كنت بسبح ربنا طالما تسبيحاتى بتزعجك

الشباك دة شكله حلو اوى..واقفة فيه بنوتة صغيرة امورة اوى..فستانها وردى..رقيق..ماسكة عصفورة صغيرة..الله دى بتحب الطيور
لسة فيه خير فى الدنيا دى..لسة فيه عينين بريئة كده
بتملس على العصفورة..وبتضمها..بتبوسها..بتأكلها..بتبتسم لها
البنت شافتنى..دى كشرت ف وشى..ودخلت جوة اوضتها
هى زعلت منى؟؟انا معملتلهاش حاجة؟؟
انا مبحبش ازعل حد وانا كنت اتمنى اشوفها مبتسمة ومبسوطة على طول..
معلش
هطير لبعيد..لبعيد اوى..ناحية النيل..موجه يغسل همومى .. اسرح فيه واشرد بجناحى وبخيالى..يمكن هناك الاقى حريتى وارتياحى

هناك 7 تعليقات:

غير معرف يقول...

كلمات من وحى الطبيعة اقتباسات من طبيعة الحياة ...كلمات رائعة كالؤلؤ فى اعماق البحار ...بجد روووعة ..بحب كتاباتك يا شمس بحس فيها ببراءة طفولية غريبة ...والاجمل انك اضافتى ملامح الطبيعة سلمت بداك وسلم عقللك الذى دائما بنير كل العقول ليفتح باب لوحى واحساس وعاطفة جديدة

غير معرف يقول...

إيه ده,استني,مبروك مدونة البلوج سبوت يا قمرة:D

أنا إيمان على فكرة,بس,غيرت المكان:)

هتلاقيني حاطة نفس اللينك هناك:)

غير معرف يقول...

سمامصر يا لون الشمس:) بس,يعني,:) هتعرفي من المدونة التانية:)

يارب تكوني بألف خير يارب,وسلمي على صاحبتنا كمان sad girl:)

لون الشمس يقول...

بسم الله الرحمن الرحيم

السلام عليكم و رحمة الله

غادة همس الندى

وايمان سما مصر

منوريننى

غير معرف يقول...

غادة همس الندى هنا :D

الأول,إيه ده,القمر,بقى 16 سنة ,بسم الله ماشاء الله تبارك الله الله أكبر:)

لون الشمس يقول...

بسم الله الرحمن الرحيم

السلام عليكم و رحمة الله

ايوة يا مونة اللى علقت ف الاول دى هية غادةة همس الندى بس اصل معندهاش بلوج

لسة كنا ف سيرتك قريب انا وهى وكانت بتقولك ان مفيش زيك ف الدنيا يا ايمان

بحسكو شبه بعض اوى اوى

و عل فكرة غادة بتموت فيكى

انتى اللى قمر يا مونة كل الناس الحياه بتغيرها وانتى لسة جميلة وطيبة

ربنا يكرمك يارب يا منون

!!! عارفة ... مش عارف ليه يقول...

البوست جميل اوووي

ورغم حزن الغراب

إلا إنه قلبه برئ

وبيحب الحياة رغم الإنطباع المأخةذ عنه

وهنا التضاد اللي أبرز المعنى


رائع بصراحه

وياريت متكسليش أوووي كده

ونشوف لكي حاجات أكتر من كده

تحياتي
وليد