الأربعاء، 26 أغسطس 2009

اغتراب (2)

بسم الله الرحمن الرحيم


السلام عليكم


انكتب عليا الترحال ..

يا براح السما ..
حاسس ان حياتى أضيق عليا من خرم الإبرة..صدرى مخنوق اوى

انا لما ببكى محدش بيحس بيا

طول عمرى لوحدى مفيش حد اشتكيله و لا ابكى ف حضنه..انا تايه ف الدنيا وعمرى ماحسيت بأمان فى حياتى

توهت و تعبت .. قربت اتجنن

مش قادر اطير تعبت..هرتاح شوية عالشجرة دى

عمرى ما صحيت مبسوط إلا واتنكدت بعدها

ايه اللى عالشجرة دة؟؟

الله دى حتة لحمة .. الحمد لله جتلى من ربنا من غير ما ادور عليها..هاكلها بئا

-ازيك يا غراب

دة التعلب ! عايز ايه دة !
-ممكن تغنيلى ؟؟ انا بحب صوتك اوى صوتك رقيق و بياخدنى لفوق .. بيحسسنى انى طاير زيك يا غراب..غنيلى


انا مش متطمنله .. معقولة صوتى حلو ؟؟

بيجامل


الحمد لله الذى اطعمنا و سقانا

ايه دة دة التعلب اكيد كان عايز حتة اللحمة اللى انا اكلتها..بس الحمد لله كلتها


حتى الكلمة الحلوة نهار ما تتقال تطلع كدب

التعلب لسة واقف فاكرنى لسة ما كلتهاش


انا ماشى يا خلق ..

يا دنيايا..يا عالمى..يا أحلامى..يا سمايا.. ليه مفيش عسل الا ف السم ؟
ليه الكلمة الحلوة دايما كدب وغدر ؟؟

ليه تخنقوا أنفاس روح الزرقة عن السما ؟؟

هلملم بقاياى بضلوعى وارتحل

هقعد لوحدى انزوى على اعماق نفسى

و روحى اضمها جوايا بضلوعى فيا واحميها وادفيها بجناحاتى

تسكننى و أأويها

عشان ما تتغيرش وتكدب زى اللى حواليا

الدنيا وحشة اوى

بس عمرى ما هتلون واغش

هستخبى تحت دموعى

تحت ضلوعى

عشان افضل صافى وبرئ

هناك 3 تعليقات:

انا حرة يقول...

تصدقى انى كنت كاتبة موضوع من فترة بنفس العنوان بس شلته مش عارفة ليه..وحستنى اوى مواضيعك و خواطرك و عفويتك فى الكتابة :)

الحــ ــزين يقول...

الحــ ــزين
بجد مدونتك جميلة جدا .وفوق الوصف

romansy يقول...

بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

عيد سعيد على كل الناس الطيبين