الأربعاء، 26 أغسطس 2009

اغتراب (2)

بسم الله الرحمن الرحيم


السلام عليكم


انكتب عليا الترحال ..

يا براح السما ..
حاسس ان حياتى أضيق عليا من خرم الإبرة..صدرى مخنوق اوى

انا لما ببكى محدش بيحس بيا

طول عمرى لوحدى مفيش حد اشتكيله و لا ابكى ف حضنه..انا تايه ف الدنيا وعمرى ماحسيت بأمان فى حياتى

توهت و تعبت .. قربت اتجنن

مش قادر اطير تعبت..هرتاح شوية عالشجرة دى

عمرى ما صحيت مبسوط إلا واتنكدت بعدها

ايه اللى عالشجرة دة؟؟

الله دى حتة لحمة .. الحمد لله جتلى من ربنا من غير ما ادور عليها..هاكلها بئا

-ازيك يا غراب

دة التعلب ! عايز ايه دة !
-ممكن تغنيلى ؟؟ انا بحب صوتك اوى صوتك رقيق و بياخدنى لفوق .. بيحسسنى انى طاير زيك يا غراب..غنيلى


انا مش متطمنله .. معقولة صوتى حلو ؟؟

بيجامل


الحمد لله الذى اطعمنا و سقانا

ايه دة دة التعلب اكيد كان عايز حتة اللحمة اللى انا اكلتها..بس الحمد لله كلتها


حتى الكلمة الحلوة نهار ما تتقال تطلع كدب

التعلب لسة واقف فاكرنى لسة ما كلتهاش


انا ماشى يا خلق ..

يا دنيايا..يا عالمى..يا أحلامى..يا سمايا.. ليه مفيش عسل الا ف السم ؟
ليه الكلمة الحلوة دايما كدب وغدر ؟؟

ليه تخنقوا أنفاس روح الزرقة عن السما ؟؟

هلملم بقاياى بضلوعى وارتحل

هقعد لوحدى انزوى على اعماق نفسى

و روحى اضمها جوايا بضلوعى فيا واحميها وادفيها بجناحاتى

تسكننى و أأويها

عشان ما تتغيرش وتكدب زى اللى حواليا

الدنيا وحشة اوى

بس عمرى ما هتلون واغش

هستخبى تحت دموعى

تحت ضلوعى

عشان افضل صافى وبرئ

السبت، 6 يونيو 2009

اغتراب(1)

بسم الله الرحمن الرحيم

السلام عليكم و رحمة الله

معلش الادراج المرة دى عبيط جدا بئا

صباح الخير يا روعة الشروق..مهما كانت وحشة الليل لازم تطلع طاقة نهار..
محدش بيواسينى ولا يحن عليا قد نور السما..قد متعة الطيران فى السما
ياترى نهارى هيطلع؟؟
ولا حياتى هتفضل زى لون ريشى..أسود
الكل بيكرهنى عشان انا غراب مع انى طيب و ما بأذيش حد
انا مش حداية بتخطف الكتاكيت الصغيرة من حنان مامتهم
انا حتى اتحرمت من حنان الام
ماما لما جابتنى للدنيا انا واخواتى طارت على طول ومن يومها ما شفتهاش
الحمامة اللى جنبنا لما جابت زغاليلها للدنيا كانت بتحصنهم بين جناحاتها وتجيبلهم الاكل والشرب من اخر الدنيا
لكن مامتنا احنا سابتنا
كنا صغيرين نفسنا نشوف مامتنا بتعلمنا الطيران زى كل الطيور
كنا حاسين بافتقاد الحنان
بس الحمد لله ربنا كان مخلى الفراشات تنجذب لنا عشان ناكلها
وكبرنا الحمد لله واترحمنا من الطفولة المجروحة دى
عيشنا زى القنافذ مع اننا طيور
القنفد مامته ما بتحضنوش عشان مليان شوك فبيبقى محروم من الحنان
لكن احنا ريشنا ناعم..لكن بنلاقى نفسنا مرميين ف الدنيا الواسعة
بنتعلم الطيران لوحدنا واهى الدنيا بتعلم
وبعد ما دوقت القسوة من اعز الناس..الام
بلاقى القسوة من كل الكائنات..بالذات البشر

يللا هطير بقى..الله بحب الطيران اوى..هو الحاجة الوحيدة اللى بتحسسنى انى من الطيور..لما بطير واحلق وسط نسايم الفجرية برتاااااااح اوى..بحس انى صفيت وهديت..بفضفض عن نفسى بالطيران..بيريحنى اوى..والتغريد بيطلع كل العذاب اللى جوايا..بغنى موالى يملا السما زى احلامى..احلامى بالحنان

بمر على مدرسة بنات..ايه دة المس اللى بتدرسلهم بتقفل الشبابيك..للدرجة دى صوتى ضايقها؟؟انا مخنوق .. مش من حقى اغنى شكوتى؟؟مش حقى افرغ غضبى و ارتاح واتنفس؟؟مش من حقى ابكى واستريح؟؟

كل الطيور بتشكى موالها مع ان مفيش طير فى قلبه حزنى..وكلهم الناس بتحب تغريدهم وانا بيكرهوا صوتى وبيكرهوا كل حاجة فيا

انا اسف انى كنت بفضفض زى ما كل الطيور بتفضفض..انا اسف انى كنت بسبح ربنا طالما تسبيحاتى بتزعجك

الشباك دة شكله حلو اوى..واقفة فيه بنوتة صغيرة امورة اوى..فستانها وردى..رقيق..ماسكة عصفورة صغيرة..الله دى بتحب الطيور
لسة فيه خير فى الدنيا دى..لسة فيه عينين بريئة كده
بتملس على العصفورة..وبتضمها..بتبوسها..بتأكلها..بتبتسم لها
البنت شافتنى..دى كشرت ف وشى..ودخلت جوة اوضتها
هى زعلت منى؟؟انا معملتلهاش حاجة؟؟
انا مبحبش ازعل حد وانا كنت اتمنى اشوفها مبتسمة ومبسوطة على طول..
معلش
هطير لبعيد..لبعيد اوى..ناحية النيل..موجه يغسل همومى .. اسرح فيه واشرد بجناحى وبخيالى..يمكن هناك الاقى حريتى وارتياحى

الثلاثاء، 22 يوليو 2008

شرود دائم

بسم الله الرحمن الرحيم
السلام عليكم
شرود دائم.فكما الارض تدور و الرياح تدور والرياح تهب والمحيطات تجرى ها أنا ذه معهم اشرد واحتار حيرة لذيذة .بلا كلل ولا ملل.لاتعلم موجة المحيط الى اين مرساها رغم انها تحمل سفينة اضخم بكتير منها.تعرف السفينة مرساها.الموجة لا تعرف سوى المجرى ولا تعرف ولا تسال اين المرسى
مثلها النسيم
مثلها الارض
مثلها الشهاب
مثلها الشمس
مثلها القمر
مثلها النظرة العينية الى الفراغ المترامى الاطراف بل ليس اطراف و حدود يا قلمى المغرور لماذا تتحدث عنى يا قلمى يا جزء منى؟ برأت نفسك ياقلمى . اننى اقوم بتعريف نفسى لذا اتحدث عن نفسى! الكل حولى يرانى صامتة ساكنة مستقرة لكنى اشرد فى الفضاء بأحلامى المفروشة الممتدة و خيول خيالى منطلقة.اجوب البحار.اعبر القارات.اخترق السماء الزرقاء.اندفع لاعماق المحيط